Данута Бічэль-Загнетава

Дабравесце

Наш край дачакаўся збаўлення нарэшце,
прынесла нам сонейка добрыя весці.
Вясна пасадзіла каткоў на вярбінку,
а сонечны зайчык нагрэў сабе спінку.

Выходзяць папасвіцца дрэўцы і птушкі,
вясёлка расчэсвае косы-істужкі,
на дужках вясёлкі гайдаюцца пчолкі,
абраз Маці Божай малююць анёлкі.

Хіба што змянілі сівыя стагоддзі
у шчэбеце птушак, у квецені бэзу
з таго Дабравесця, як з Неба прыходзіў
Пасланец сказаць, што народзіцца Езус?